सङ्खुवासभा । सङ्खुवासभाको सभापोखरी गाउँपालिकामा रुख काट्ने क्रममा आज बुधवार एक जनाको ज्यान गएको छ ।
ज्यान गुमाउनेमा सभापोखरी–२ विप्लप गैरीगाउँका ४० वर्षीय खड्गबहादुर तामाङ रहेका जिल्ला प्रहरी कार्यालयका प्रहरी निरीक्षक सरोज खनालले जानकारी दिनुभयो । उहाँका अनुसार आज दिउँसो जङ्गलमा दाउराका लागि उत्तिसको रुख काट्ने क्रममा त्यही रुखले लागेर उहाँको ज्यान गएको हो ।
प्रहरी टोली घटनास्थलमा पुगि मुचुल्का तयार गरी पोस्टमार्टमका लागि जिल्ला अस्पताल ल्याइँदै गरेको प्रहरीको भनाइ छ । घटनास्थल सदरमुकाम खाँदबारीबाट एक दिनको पैदल दुरीमा पर्छ ।
