संखुवासभा । मोरङस्थित विराटनगरको एभरेष्ट एजुकेशन फाउण्डेसन र खाँदबारी नगरपालिका बीच सहमती भएको छ । फाउण्डेसनका प्रवन्ध निर्देशक तथा प्रिन्सिपल टिकाराम पूरी र खाँदबारी नगरपालिकाका मेयर महेश थपलिया बीच बिहिबार कक्षा ११ र १२ का विद्यार्थीहरुलाई छात्रवृत्ति उपलव्ध गराउने सहमति पत्रमा हस्ताक्षर भएको हो ।
एभरेष्ट एजुकेशन फाउण्डेसनले खाँदबारी नगरपालिका भित्रका अति गरिव, जेहन्दार तथा मेहनती ५ जना विद्यार्थीहरुका लागि एभरेष्ट उच्च शिक्षा छात्रवृत्ति दिइने भएको हो ।
उक्त फाउण्डेसनले खाँदबारी नगरपालिकाको सिफारिसमा खाँदबारी नगर क्षेत्रभित्रका अति गरिव, जेहन्दार तथा मेहनती विज्ञान तर्फका ३ जना र व्यवस्थापन तर्फका २ जना विद्यार्थीहरुलाई छात्रवृत्ति उपलव्ध गराउने सहमतिपत्रमा उल्लेख गरिएको छ । सो छात्रवृत्ति खाँदबारी नगरपालिकाले निश्चित कार्यविधी बनाई हरेक वर्ष शिक्षा दिवस वा वार्षिक उत्सवको अवसरमा वितरण गर्ने खाँदबारी नगरपालिकाका मेयर महेश थपलियाले जानकारी दिए । उनले समग्र खाँदबारी नगरपालिकाको विकासका लागि विभिन्न ब्यक्ति ब्यक्तित्व र संघसंस्थाहरुको सहयोग जुटाउन आफु लागि परेको र यो छात्रबृत्ति पनि त्यसैको प्रतिफल भएको बताए ।
मेयर थपलियाले खाँदबारी नगरपालिकामा यस्तो किसिमको छात्रवृत्ति उपलव्ध गराई सामाजिक उत्तरदायित्व निर्वाह गरेकोमा एभरेष्ट एजुकेशन फाउण्डेसनलाई विशेष धन्यवाद तथा आभार प्रकट गरेका थिए ।
उक्त सहमतिपत्रमा हस्ताक्षर गर्दै एभरेष्ट एजुकेशन फाउण्डेसनका प्रवन्ध निर्देशक तथा प्रिन्सिपल टिकाराम पूरीले सामाजिक उत्तरदायित्व निर्वाह गर्न विकट हिमाली जिल्ला संखुवासभाको खाँदबारी नगरपालिकालाई एभरेष्ट छात्रवृत्ति प्रदान गरिएको बताए । उनले शिक्षाको उज्यालो ज्योतीबाट गरिब तथा विपन्न विद्यार्थीले वन्चित हुन नपरोस भनेर आफुले छात्रवृत्ति प्रदान गर्ने सोच बनाएको बताए ।
खाँदबारी नगरपालिकाका प्रमुख प्रशासकीय अधिकृत युवराज आचार्यले शिक्षाका क्षेत्रमा विराटनगरका दुई कलेजसँग सम्झौता गरि नगरपालिकाले अत्यन्तै राम्रो काम गरेको प्रतिकृया दिए ।
डिएभी उच्च शिक्षा छात्रवृत्ति पनि खाँदबारीलाई
त्यसैगरि विराटनगरको डिएभी स्कुलले पनि खाँदबारी नगरपालिकालाई डिएभी उच्च शिक्षा छात्रवृत्ति प्रदान गरेको छ ।
विहिवार नै डिएभी स्कुलका प्रिन्सिपल रमेशकुमार मिश्रा र खाँदबारी नगरपालिका मेयर महेश थपलिया बीच सहमतिपत्रमा हस्ताक्षर भएको छ । सहमती अनुसार डिएभी स्कुल विराटनगरले खाँदबारी नगरपालिकाको सिफारिसमा हरेक वर्ष कक्षा ११ र १२ का विज्ञान तर्फका २ जना विद्यार्थीलाइ निःशुल्क छात्रवृत्ति उपलव्ध गराउने भएको छ ।