काठमाण्डौ । नेपाली कांग्रेसको संस्थापन इतर पक्षले पार्टीको अनुशासन समितिले पूर्वाग्रह राखेर पार्टीका नेताहरूमाथि कारबाही गरेको निष्कर्ष निकालेको छ । संस्थापन इतर पक्षका नेता डा। शेखर कोइरालाको सचिवालयमा आज भएको संस्थापन इतर समूहले अनुशासन समितिले पूर्वाग्रह राखेर पार्टीका नेताहरूमाथि कारबाही गरेको निष्कर्ष निकालेको हो ।
नेताहरूले विधानतः कारबाही उचित नरहेको बताएका छन् । नेपाली कांग्रेसले संस्थापन इतर समूहको असहमतिका बीच बहुमतको आधारमा नेताहरूमाथि कारबाही गरेपछि डा। शेखर कोइराला समूहले असन्तुष्टि जनाएको हो ।
आनन्दप्रसाद ढुङ्गाना संयोजक रहेको अनुशासन समितिले बहुमतका आधारमा केही नेताहरूमाथि कारबाहीको निर्णय गरेको थियो । २०७९ सालमा भएको चुनावमा पार्टीका उम्मेदवार वा पार्टीले समर्थन गरेका उम्मेदवारविरुद्ध कार्य गरेको आरोपमा तीन वर्षपछि कारबाही गरिएको हो ।
कांग्रेस नेता अर्जुननरसिंह केसीले कारबाही पक्षपातपूर्ण र पूर्वाग्रही रहेको बताउनुभएको छ । अर्का कांग्रेस नेता एवम् अनुशासन समिति सदस्य सञ्जय गौतमले पनि कारबाहीको निर्णय उचित नरहेको र यसबारे पुर्नविचार गर्न पार्टी सभापति शेरबहादुर देउवासमक्ष आग्रह गरिने बताउनुभएको छ ।
