ब्राजिलमा भएको २० वर्षमुनिको फुटबल खेलमा रेफ्रीले ५१ जनालाई रातो कार्ड देखाएर विश्व कीर्तिमान कायम भएको छ ।
ब्राजिलको मिनास जेराइस राज्यको युथ च्याम्पियनशिप अन्तर्गत उबरल्यान्डिया र मामोरेबीचको खेलमा रेफ्रीले कीर्तिमानी सङ्ख्यामा रातो कार्ड देखाएका हुन् ।
रेफ्रीले मैदानभित्र र बाहिर रहेका ४३ जना खेलाडी तथा ८ जना कोचिङ स्टाफ गरी ५१ जनालाई रातो कार्ड दिएका बीबीसीले जनाएको छ । केही खेल प्रतिवेदनहरूका अनुसार २ बोर्ड सदस्यसहित रेड कार्ड पाउनेकाे सङ्ख्या ५३ सम्म पुगेको उल्लेख छ ।
खेलको दोस्रो हाफमा मामोरे टोली ३–१ ले अघि परेपछि उनका खेलाडी डाभीले विपक्षी टोलीको बेन्चतर्फ फर्केर गिज्याउने र जिस्काउने इसारा गरेका थिए । त्यसपछि उबेरल्यान्डियाका गोलकिपिङ कोच मैदानभित्र पसेर उनलाई धकेलेपछि दुवै टोलीका खेलाडी र स्टाफहरूबीच कुटाकुट तथा कुर्सी र स्ट्रेचरसमेत हानाहान भएको खबरमा उल्लेख छ ।
स्थिति नियन्त्रणबाहिर गएपछि रङ्गशाला र भौतिक संरचनाको क्षति रोक्न सैन्य पुलिसलाई नै मैदानमा बोलाउनुपरेको थियो । यसपछि खेल रद्द गरिएको थियो ।
यसअघि सन् २०११ मा अर्जेन्टिनाको पाँचौँ डिभिजनको खेलमा रेफ्रीले ३६ वटा रातो कार्ड देखाएका थिए ।
प्रतिक्रिया दिनुहोस्