‘कक्रोच जनता पार्टी’ (सीजेपी) ले मुम्बईमा आयोजना गरेको विरोध प्रदर्शनमा सहभागी भएको केही दिनपछि मुम्बई प्रहरीले अभिनेता इमरान खानलाई भारत छोड्न भनेको छ ।
मुम्बई प्रहरीले बलिउड सुपरस्टार आमिर खानका भान्जासमेत रहेका ४३ वर्षीय अभिनेतालाई देश छोड्नका लागि अक्टोबर २८ सम्मको समयसीमा दिएको भारतीय सञ्चारमाध्यमले जनाएका छन् ।
भारतीय नागरिक नभए पनि विरोध प्रदर्शनमा सहभागी भएको भन्दै अध्यागमन ऐनको सान्दर्भिक प्रावधानअन्तर्गत इमरान खानविरुद्ध कारबाही गरिएको प्रहरीले भनेको छ ।
रिपोर्टहरूका अनुसार खानसँग अमेरिकी नागरिकता छ र उनीसँग पूर्ण भारतीय नागरिकताको सट्टा ‘ओभरसिज सिटिजन अफ इन्डिया’ (ओसीआई) कार्ड रहेको खबरमा उल्लेख छ । यद्यपि यसको आधिकारिक पुष्टि भने भएको छैन ।
‘इमिग्रेशन एन्ड फरेनर्स एक्ट २०२५’ का प्रावधानहरूअन्तर्गत रही यो प्रस्थान सूचना जारी गरिएको हो । यस ऐनको दफा ७ ले भारतको केन्द्रीय सरकारलाई भारतभित्र विदेशीहरूको प्रवेश, प्रस्थान, उपस्थिति वा आवतजावतलाई नियमन गर्न, सीमित गर्न वा निषेध गर्नका लागि आदेश, निर्देशन वा निर्देशहरू जारी गर्ने अधिकार प्रदान गर्दछ ।
मुख्य निर्वाचन आयुक्त ज्ञानेश कुमारविरुद्ध विरोध प्रदर्शन गर्न यही अक्टोबर १० मा मुम्बईको अगस्ट क्रान्ति मैदानमा भेला भएकाहरूमध्ये इमरान खान पनि थिए । प्रदर्शनका क्रममा प्रहरीले उनलाई हिरासतमा लिएर पछि छाडेको थियो ।
प्रतिक्रिया दिनुहोस्