अमेरिकी राष्ट्रपति डोनाल्ड ट्रम्पले इरानसँगको युद्ध र तनाव अब छिट्टै कुनै निष्कर्षमा पुग्ने बताउँदै थप सैन्य कारबाहीको सम्भावनासमेत खुला राख्नुभएको छ ।
ह्वाइट हाउसमा पत्रकारहरूसँग कुरा गर्दै ट्रम्पले इरानसँग सम्झौता गर्ने वा सैन्य कारबाही अघि बढाउनेमध्ये कुनै एक निर्णय छिट्टै हुनसक्ने बताउनुभएको अलजजिराले जनाएको छ ।
उहाँले इरानमा चाँडै केही हुने र विवाद एक न एक तरिकाले अन्त्य हुने दाबी गर्नुभयो । तर, पछिल्लो अवस्थाले अमेरिका र इरानबीच कूटनीतिक प्रयास पनि समानान्तर रूपमा अघि बढिरहेको देखाएको छ ।
इरानले अमेरिकाबाट आफ्नो पछिल्लो प्रस्तावमाथि औपचारिक जवाफ प्राप्त गरेको जनाएको छ । इरानले यसअघि सात दिनको युद्धविराम र त्यसपछि चरणबद्ध रूपमा हर्मुज जलमार्ग फेरि खोल्ने प्रस्ताव अघि सारेको थियो । त्यसको बदलामा अमेरिकाले इरानमाथिको नाकाबन्दी हटाउने, रोक्का गरिएका सम्पत्तिमाथि सहजीकरण गर्ने र तेलसम्बन्धी प्रतिबन्धमा राहत दिनुपर्ने इरानको प्रस्ताव थियो ।
अमेरिकी राष्ट्रपति ट्रम्पले भने इरानको प्रस्ताव आफूले स्वीकार नगरेको बताउँदै आउनुभएको छ । यद्यपि, कतारलगायत मध्यस्थकर्तामार्फत अमेरिका र इरानबीच अप्रत्यक्ष सम्पर्क तथा वार्ता चलिरहेका छन् । पछिल्लो अमेरिकी जवाफको विस्तृत विवरण भने सार्वजनिक गरिएको छैन । हर्मुजको अवस्था अझै विश्वका लागि महत्वपूर्ण बनेको छ ।
पछिल्ला दिनमा यो जलमार्गबाट तेलको आवागमनमा सुधार आए पनि युद्ध, नाकाबन्दी, सुरक्षा जोखिम र बढेको बीमा लागतका कारण अवस्था अझै सामान्य भइसकेको अन्तर्राष्ट्रिय सञ्चारमाध्यमले जनाएका छन् ।
प्रतिक्रिया दिनुहोस्