आइतबार हावाहुरीसहित परेको चट्याङले मकालु गाउँपालिका वडा नं. ३ मा १७ ओटा चौपाय मरेका छन् । कालोपातल खर्कमा रहेको ३ परिवारका १७ ओटा गाई, गोरु र भैंसी चट्याङमा परी मरेको वडा अध्यक्ष बद्री बहादुर राईले बताउनु भयो ।
साँझतिर परेको चट्याङले पुस्पलाल भण्डारी र प्रेमनाथ भण्डारीको ११ ओटा भैसी र ४ ओटा गाई, गोरु मरेको हो । यस्तै कृष्ण बहादुर राईको २ ओटा गाई र गोरु मरेको वडा अध्यक्ष राईले बताउनु भयो । खर्कमा राखिएका चौपाय हावाहुरीसहित पानी परेकाले एकै ठाउँमा जम्मा भएर बसेको बेला चट्याङ परेको बताइएको छ ।
