काठमाण्डौ । अछामको पञ्चदेवल विनायक नगरपालिकामा त्रिपालले बनाएको छाउगोठमा सुतेको बेला भीरबाट खसेको ढुङ्गाले लागेर एकजना महिला र अर्की बालिकाको ज्यान गएको छ । पञ्चदेवल विनायक नगरपालिका ८ की ३५ वर्षीया निम जैसी खनाल र मामाघर आएकी मङ्गलसेन नगरपालिका-६ की ८ वर्षीया कविता भण्डारीको ज्यान गएको प्रहरीले जनाएको छ ।
जिल्ला प्रहरी कार्यालयका प्रहरी निरीक्षक टेकबहादुर देउवाले उज्यालोलाई दिनुभएको जानकारी अनुसार सँगै सुतेकी कविताकी आमा ४० वर्षीया रत्ना भण्डारी घाइते हुनुभएको छ । मङ्गलसेन नगरपालिका घर भएकी रत्ना माइत गएको बेला भाउजू निम जैसीसँगै छाउगोठमा सुत्नुभएको थियो ।
आठ वर्षीया बालिका पनि आमा र माइजुसँगै छाउगोठमै सुतेकी थिइन् । घर नजिकै रहेको छाउगोठमा सुतेको बेला गएराति भीरबाट ढुङ्गा खसेर उनीहरुलाई लागेको प्रहरीले जनाएको छ ।
