थाइल्यान्डको संवैधानिक अदालतले प्रधानमन्त्री पेतोङतार्न शिनावात्रालाई पदबाट हटाएको छ । अदालतले प्रधानमन्त्री शिनावात्रालाई पदबाट हटाउँदै मन्त्रिपरिषद् विघटन गरेको बीबीसीले जनाएको छ । शिनावात्रा सन् २००८ पछि संवैधानिक अदालतले पदबाट हटाएको थाइल्यान्डकी पाँचौं प्रधानमन्त्री बन्नुभएको छ ।
कम्बोडियाका पूर्वप्रधानमन्त्री हुन सेनसँगको फोनवार्ता चुहावट भएपछि उत्पन्न विवादका कारण उहाँ गएको जुलाईमा निलम्बनमा पर्नुभएको थियो । उहाँले थाई सेनाको उत्तरपूर्वी कमान्डरलाई आफ्नो प्रतिद्वन्द्वीका रूपमा उल्लेख गरेको र हुन सेनलाई ‘काका’ भनेर सम्बोधन गरेको कुराकानीले नागरिकमा आक्रोश निम्तिएको थियो ।
पेतोङतार्न शिनावात्रा थाइल्यान्डकी सबैभन्दा कान्छी प्रधानमन्त्री हुनुहुन्थ्यो । उहाँले ३७ वर्षको उमेरमा पदभार ग्रहण गर्नुभएको थियो । यस्तै उहाँ देशको दोस्रो महिला प्रधानमन्त्री पनि बन्नुभयो ।
पेतोङतार्न थाई अर्बपति तथा पूर्वप्रधानमन्त्री थाक्सिन शिनावात्राकी छोरी हुनुहुन्छ । उहाँ सन् २०२१ मा फेउ थाई पार्टीमा सामेल भएर २०२३ मा पार्टीको नेता बन्नुभएको थियो । गएको वर्ष थाई संसद्ले पेतोङतार्न शिनावात्रालाई उहाँको पूर्ववर्ती स्रेथ्था थाविसिनको ठाउँमा निर्वाचित गरेको थियो । मन्त्रिपरिषद् नियुक्ति नियमहरू उल्लङ्घन गरेको आरोपमा संवैधानिक अदालतले थाविसिनलाई पदबाट हटाएको थियो ।
शिनावात्रा परिवारले दशकौंदेखि थाई राजनीतिमा प्रभुत्व जमाउँदै आएको छ र पेतोङ्तार्नको पदबाट बहिर्गमन यस राजनीतिक परिवारका लागि ठूलो धक्का भएको विश्लेषण गरिएको छ ।
