काठमाण्डौ । पर्सामा हैजाको सङ्क्रमितको सङ्ख्या घट्न थालेको छ । दुई हप्ता अघि अर्थात् भदौ ६ गते शुक्रवारदेखि देखिएको हैजाको सङ्क्रमण पछिल्ला केही दिनदेखि घटेको हो ।
जिल्ला स्वास्थ्य कार्यालय पर्साका अनुसार पछिल्लो २४ घण्टामा झाडापखालाको २८ जना नयाँ बिरामी थपिएका छन् । अब एक हप्तामा झाडापखाला र हैजाका नयाँ बिरामी आउने क्रम रोकिने अनुमान रहेको नारायणी अस्पतालका प्रवक्ता डा. उदयनारायण सिंहले बताउनुभयो ।
दुई हप्तामा झाडापखाला र हैजाका एक हजार ५४ बिरामी उपचारका लागि अस्पताल भर्ना भएकामा दुई सय दुई जनामा हैजा सङ्क्रमण पुष्टि भएको छ । उनीहरु मध्ये एक सय ८८ जना वीरगञ्ज महानगरपालिका र १४ जना पोखरिया नगरपालिकामा बसोबास गर्ने हुन् ।
हैजा सङ्क्रमितमध्ये एक सय ८६ जना उपचारपछि घर फर्किएका छन् । १६ अझै पनि विभिन्न अस्पतालमा उपचाररत छन् । यस्तै झाडापखालाका समेत गरी एक सय पाँच जना बिरामी अस्पतालमा उपचाररत रहेका जिल्ला स्वास्थ्य कार्यालय पर्साले जनाएको छ ।
