काठमाण्डौ । संसदीय सुनुवाइ समितिका सभापति रामहरि खतिवडाले शपथ ग्रहण गर्नुभएको छ । सभापतिमा निर्वाचित खतिवडाले सभामुख देवराज घिमिरेबाट पद तथा गोपनीयताको शपथ ग्रहण गर्नुभएको हो ।
राज्य व्यवस्था तथा सुशासन समितिमा निजामती सेवा विधेयकमा छेडखानी गरेको आरोपमा संसदीय छानबिन समितिले नैतिक जिम्मेवार ठहराएसँगै समिति सभापतिबाट राजीनामा दिएका खतिवडा संसदीय सुनुवाइ समितिको सभापति निर्वाचित हुनुभएको हो ।
संसदीय समिति सभापति ईश्वरीदेवी न्यौपाने राज्य व्यवस्था तथा सुशासन समिति सभापति बनेसँगै संसदीय सुनुवाइ समिति सभापतिको पद रिक्त थियो । रिक्त पदमा नेपाली कांग्रेसबाट खतिवडाको मात्रै उम्मेदवारी परेपछि उहाँ संसदीय सुनुवाइ समितिको सभापति निर्वाचित हुनुभएको थियो ।
