काठमाण्डौ । सरकारले थप तीन वटा जलविद्युत् आयोजनालाई विद्युत् उत्पादन अनुमति दिएको छ । ऊर्जा, जलस्रोत तथा सिँचाइ मन्त्रालय मातहतको विद्युत् विकास विभागले चुम्चेत स्यार खोला जलविद्युत् आयोजना, मिडिल लिखु जलविद्युत् आयोजना र छोमरोङ खोला जलविद्युत् आयोजनालाई विद्युत् उत्पादन गर्ने अनुमति दिएको हो ।
चिलिमे जलविद्युत् कम्पनीले निर्माण गर्ने चुम्चेत स्यार खोला जलविद्युत आयोजनाको क्षमता ४५ मेगावाट बराबर रहेको छ । यस्तै, विभागले अनुमति दिएको मिडिल लिखु जलविद्युत् आयोजनाको क्षमता आठ दशमलव ६० मेगावाट रहेको छ । साथै छोमरोङ खोला जलविद्युत् आयोजनालाई पनि विद्युत् उत्पादन अनुमतिपत्र प्रदान गरेको छ ।
घान्द्रकु हाइड्रोले निर्माण गर्ने यो आयोजना चार दशमलव ८९ मेगावाट बराबर छ । विभागले अहिलेसम्म दुई सय ६३ आयोजनालाई विद्युत् उत्पादन अनुमतिपत्र प्रदान गरेको छ ।
ती आयोजनाको कूल क्षमता ११ हजार ९७ मेगावाट बराबर छ । विभागले चालू आर्थिक वर्षको अहिलेसम्म १३ जलविद्युत् आयोजनालाई विद्युन् उत्पादन अनुमतिपत्र दिएको जनाएको छ ।
