काठमाण्डाै । नेपालमा अहिले ३४ हजार ३ सय ३७ जना एचआईभी सङ्क्रमित रहेको राष्ट्रिय एड्स तथा यौन रोग नियन्त्रण केन्द्रको तथ्याङ्क छ । उनीहरूमध्ये २६ हजार ३ सय ७२ जना उपचारको दायरामा आएका केन्द्रका निर्देशक डा. सर्वेश शर्माले जानकारी दिनुभयो ।
विश्व एड्स दिवसको अवसरमा काठमाण्डौमा आयोजित कार्यक्रममा बोल्दै निर्देशक शर्माले उपचार बाहिर रहेका सङ्क्रमितहरू एचआईभी सङ्क्रमण फैलाउन सक्ने मुख्य चुनौतीका रूपमा रहेका बताउनुभयो । सङ्क्रमितले ठेगाना तथा फोन नम्बर गलत टिपाउने र बसाइसराइँ गर्ने गरेकाले उनीहरूलाई सम्पर्क गरेर उपचार गराउन पनि कठिन रहेको डाक्टर शर्माले बताउनुभयो ।
एचआईभी सङ्क्रमितलाई सरकारले निःशुल्क औषधि उपचारको व्यवस्था गरेको छ । नेपालमा सन् २०३० सम्ममा एड्स तथा एचआईभी निर्मूल गर्ने लक्ष्य छ । तर राष्ट्रिय एचआईभी रणनीतिक योजना २०२१–२०२६ अनुसार उच्च जोखिममा रहेकाहरूका लागि एचआईभी रोकथाम कार्यक्रम तथा सङ्क्रमित र प्रभावितका लागि उपचार, हेरचाह तथा सहयोग कार्यक्रम सञ्चालन भए पनि प्रभावकारी हुन सकेको छैन ।
‘ह्युमन इमुनो डिफिसेन्सी भाइरस’ अर्थात् एचआईभी शरीरमा प्रवेश गरेपछि प्रतिरक्षा प्रणालीमा आक्रमण गरी प्रतिरोधात्मक क्षमता घटाउँदै लैजान्छ । एकपटक एचआईभी सङ्क्रमित भएपछि उसले जीवनभर यससँगै बाँच्नुपर्छ । उचित चिकित्सकीय हेरचाह र उपचारको सहयोगमा एचआईभी सङ्क्रमणलाई नियन्त्रणमा भने राख्न सकिन्छ ।
भोलि अर्थात् डिसेम्बर १ तारिखमा नेपालसहित विश्वभरि नै ३८औं विश्व एड्स दिवस मनाइँदैछ । यस वर्षको नारा ‘अवरोधहरू पार गरौँ, एड्स प्रतिकार्य रूपान्तरण गरौँ’ भन्ने रहेको छ ।
