काठमाण्डाै । हिजो घटेको शेयर बजार आज दोहोरो अङ्कले बढेको छ । शेयर बजार परिसूचक नेप्से आज २७ दशमलव १९ अङ्कले बढेर २ हजार ७ सय ८ दशमलव ७० विन्दुमा पुगेको छ ।
आज व्यापार बाहेक सबै समूहको शेयर बढेकोमा निर्जीवन बीमा र अन्य समूहको शेयर झन्डै २ प्रतिशतले उकालो लागेको छ । आज २ सय १ वटा कम्पनीको शेयर बढेकोमा ५५ वटाको घटेको छ । यस्तै ४ वटा कम्पनीको शेयर घटबढ भएको छैन ।
आज कालिञ्चोक दर्शन, सुपर माई हाइड्रोपावर र मोदी इनर्जी कम्पनीको शेयर १० प्रतिशतले बढेको छ । समग्रमा बजार बढेको दिन सुपर मादी हाइड्रोपावर कम्पनीको शेयर भने झन्डै १० प्रतिशतले घटेको छ ।
आज नेप्सेसँगै कारोबार रकम पनि बढेको छ । हिजो ७ अर्ब ४९ करोडको कारोबार भएकोमा आज ३ सय २६ वटा कम्पनीका ३ करोड ५५ लाख कित्ता शेयर ११ अर्ब ५८ करोड रुपैयाँमा किनबेच भएको छ ।
