काठमाण्डौ । अर्थविद् केशव आचार्यको निधन भएको छ । उहाँको उपचारका क्रममा आज बिहान अन्नपूर्ण न्युरो अस्पतालमा निधन भएको आचार्यका छोरा शिखरले जानकारी दिनुभयो । आचार्यको शव अहिले चाबहिलमा रहेको ओम नर्सिङ होममा राखिएको र भोलि दाहसंस्कार गरिने शिखरले बताउनुभयो ।
गएको मङ्गलवार स्वास्थ्यमा समस्या देखिएपछि उहाँलाई उपचारका लागि मेडिकेयर अस्पताल भर्ना गरिएको थियो । त्यसपछि उहाँलाई मस्तिष्कघातको उपचारका लागि अन्नपूर्ण न्युरो अस्पतालमा लगिएको थियो ।
आचार्यको छोरी अचला अमेरिकाबाट भोलि बिहान काठमाण्डौ आइपुग्ने र त्यसपछि पशुपति आर्यघाटमा दाहसंस्कार गरिने पारिवारिक स्रोतले जानकारी दिएको छ । नेपाल राष्ट्र बैंकमा झन्डै तीन दशकभन्दा बढी सेवा गरेर कार्यकारी निर्देशकबाट अवकाश प्राप्त गर्नुभएका आचार्यले अर्थ मन्त्रालयको वरिष्ठ आर्थिक सल्लाहकारको भूमिकासमेत निभाउनुभएको थियो । उहाँ मौद्रिक तथा वित्त नीतिका ज्ञाता मानिनुहुन्थ्यो ।
