काठमाण्डौ । नेपालमा सबैभन्दा धेरै नयाँ कुष्ठरोगका बिरामीहरू मधेश प्रदेशमा फेला परेका जनसङ्ख्या मन्त्रालयका सचिव डा. विकास देवकोटाले जानकारी दिनुभएको छ ।
आजदेखि काठमाण्डौमा शुरू भएको कुष्ठरोगसम्बन्धी अन्तर्राष्ट्रिय सम्मेलनमा उहाँले मधेश, लुम्बिनी र कोशी प्रदेशमा क्रमशः रोगको उच्च भार रहेको बताउनुभयो । उहाँका अनुसार मधेश प्रदेशमा कुल कुष्ठरोगीको एक तिहाइभन्दा बढी रहेका छन् ।
दोस्रोमा लुम्बिनी प्रदेश रहेको छ । जहाँ कुल कुष्ठरोगीको एक चौथाइभन्दा बढी कुष्ठरोगीहरू रहेका स्वास्थ्य मन्त्रालयका सचिव डा. देवकोटाले बताउनुभयो । आर्थिक वर्ष २०८०/०८१ को अन्त्यसम्म नयाँ फेला परेका दुई हजार चार सय ७२ कुष्ठरोगीमध्ये महिलाको सङ्ख्या एक हजार ४२ रहेको छ ।
त्यस्तै १४ वर्षमुनिका नयाँ बिरामीको सङ्ख्या एक सय ३६ रहेको सचिव डा। देवकोटाको भनाइ छ । उहाँले पहिचान रहेका सबै कुष्ठरोगका बिरामीहरू उपचाररत रहेको बताउनुभयो ।
त्यस्तै कुष्ठरोग निवारणका लागि रोगको प्रकोप दर एकभन्दा कम हुनुपर्छ । प्रति १० हजार जनसङ्ख्यामा एक जनाभन्दा कम व्यक्ति रोगी रहेको अवस्था हुनुपर्छ ।
आर्थिक वर्ष २०८०.०८१ को तथ्याङ्कलाई विश्लेषण गर्दा कुष्ठरोगको प्रकोप दर राष्ट्रिय तहमा एकभन्दा कम (०.९२ प्रतिशत) रहेको छ । तर जिल्ला तहको प्रकोप दर हेर्दा ७७ जिल्लामध्ये १८ जिल्लामा एकभन्दा माथि, ४८ जिल्लामा एकभन्दा कम, ११ जिल्लामा कुष्ठरोगका कुनै पनि नयाँ बिरामी फेला परेका छैनन् ।
