दाङ । रोल्पामा जङ्गली च्याउ खाँदा बिरामी परेका एक जनाको उपचारका क्रममा ज्यान गएको छ । परिवर्तन गाउँपालिका वडा नम्बर २ राङसीकी ७४ वर्षीया निर्मला वलीको उपचारका क्रममा दाङको घोराहीमा रहेको राप्ती स्वास्थ्य विज्ञान प्रतिष्ठानमा ज्यान गएको हो ।
यस्तै च्याउ खाँदा बिरामी पर्नुभएका निर्मलाका श्रीमान् ८१ वर्षीय भागीराम वलीको उपचार भइरहेको छ । वली दम्पतीले साउन २७ गते बेलुका स्थानीय जङ्गलबाट खोजेर ल्याएको च्याउको तरकारी खाएका थिए ।
च्याउ खाएपछि बिरामी परेका उनीहरूलाई स्थानीय मेडिकलमा सामान्य उपचारपछि साउन २९ गते स्वास्थ्य विज्ञान प्रतिष्ठानमा भर्ना गरिएको थियो । निर्मलाको उपचारका क्रममा आज ज्यान गएको जिल्ला प्रहरी कार्यालय दाङले जानएको छ ।
