काठमाण्डाै । राष्ट्रिय स्वतन्त्र पार्टी (रास्वपा) र विवेकशील साझा पार्टीबीच एकता घोषणा भएको छ । काठमाण्डाैको राष्ट्रिय सभागृहमा आज आयोजित एकता घोषणा सभामा रास्वपाका तर्फबाट कार्यवाहक सभापति डोलप्रसाद अर्याल र डा. स्वर्णिम वाग्लेले हस्ताक्षर गर्नुभएको छ भने विवेकशील साझाको तर्फबाट अध्यक्ष समीक्षा बाँस्कोटा र उपाध्यक्ष प्रकाशचन्द्र परियारले हस्ताक्षर गर्नुभएको छ ।
एकतापछि पार्टीको नाम रास्वपा र चुनाव चिह्न घण्टी नै रहने सहमति भएको छ । त्यस्तै विवेकशील साझाका नेताहरूलाई पार्टी महाधिवेशनसम्मका लागि सङ्घीय नेतृत्व मञ्चमा राख्ने सहमति भएको छ । मञ्च सदस्यहरूको हैसियत केन्द्रीय सदस्यसरह हुने बताइएको छ ।
दुई दलबीच भएको पाँच बुँदे सहमतिमा वैकल्पिक राजनीतिको प्रवर्द्धनमा स्व. उज्वल थापा एवम् ‘विवेकशील अभियान’ को योगदानलाई दस्तावेजीकरण गरी मान्यता दिने उल्लेख छ ।
विवेकशील साझाका नेता मिलन पाण्डेले भने सामाजिक सञ्जालमा लेख्दै आफू रास्वपासँगकाे एकता प्रक्रियाबाट बाहिरिएकाे जानकारी गराउनुभएको छ ।
