काठमाण्डाै । हप्ताको पहिलो दिन शेयर बजार दोहोरो अङ्कले घटेको छ । शेयर बजार परिसूचके नेप्से आज २६ दशमलव ५१ अङ्कले घटेर २ हजार ६ सय ४९ दशमलव ५२ विन्दुमा झरेको छ ।
आज उत्पादन र म्युचल फन्ड बाहेक सबै समूहको शेयर घटेकोमा लगानी समूहको शेयर सबैभन्दा धेरै १ दशमलव ४८ प्रतिशतले ओरालो लागेको छ । यस्तै बैंक, विकास बैंक, जलविद्युत्, जीवन बीमा, माइक्रोफाइनान्स, अन्य समूहको शेयर १ प्रतिशतभन्दा धेरैले घटेको छ ।
आज २ सय ११ वटा कम्पनीको शेयर घटेकोमा ४५ वटाको बढेको छ । यस्तै मानुषी लघुवित्त कम्पनीको शेयर घटबढ भएको छैन ।
आज नेपाल इन्भेस्टमेन्ट मेगा बैंकको ‘एनआईएमबी’ डिबेन्चर ९ प्रतिशतले घटेको छ । समग्रमा बजार घटेको दिन सागर डिस्टिलरी, निफ्रा ग्रीन इनर्जीको डिबेन्चर, स्वस्तिक लघुवित्त, झापा इनर्जी, श्रीनगर एग्रिटेक इन्डन्स्ट्रिज कम्पनीको शेयर भने १० प्रतिशतले बढेको छ ।
आज नेप्से घटे पनि कारोबार रकम भने बढेको छ । गएको बिहीवार ६ अर्ब ६६ करोडको कारोबार भएकोमा आज ३ सय ४२ वटा कम्पनीको १ करोड ५७ लाख कित्ता शेयर ७ अर्ब ८ करोड रुपैयाँ किनबेच भएको छ ।
