काठमाण्डौ । विश्व सामाजिक न्याय दिवस आज नेपालमा पनि विभिन्न कार्यक्रम गरी मनाईंदैछ । समाजमा रहेको असमानता, विभेद, गरिबी, बेरोजगारी र बहिष्करणजस्ता समस्यालाई सम्बोधन गर्ने उद्देश्यले सन् २००७ नोभेम्बर २६ मा संयुक्त राष्ट्रसङ्घको महासभाले प्रस्ताव पारित गरेपछि सन् २००९ देखि हरेक वर्ष फेब्रुअरी २० मा यो दिवस मनाउन थालिएको हो ।
सामाजिक न्यायले व्यक्तिको जाति, लिङ्ग, धर्म, रंग, अपांगता वा सामाजिक–आर्थिक अवस्थाका आधारमा कुनै भेदभाव नगरी सबैलाई समान अवसर र अधिकार सुनिश्चित गर्नुपर्नेमा जोड दिन्छ । अन्तर्राष्ट्रिय मजदुर संगठनका अनुसार सबैका लागि निष्पक्षता, समानता र आफ्नो जीवनको दिशा निर्धारण गर्ने अधिकार सुनिश्चित गर्नु नै सामाजिक न्याय हो ।
सामाजिक न्याय शान्ति र समृद्धिको आधार मानिन्छ । तर, अझै पनि विश्वका धेरै मानिस विभेद, शोषण र अवसरबाट वञ्चित भइरहेका छन् । यो दिवसले सरकार, विभिन्न संस्था र नागरिकलाई समावेशी समाज निर्माणतर्फ सक्रिय हुन आह्वान गर्दछ । नेपालमा पनि सामाजिक न्याय र समावेशी विकासलाई प्राथमिकतामा राखेर विभिन्न कार्यक्रम सञ्चालन भइरहेका छन् ।
नेपाल सरकार, पालिका सरकार तथा अन्तर्राष्ट्रिय संस्थाहरूले महिला, बालबालिका, युवा तथा गरिबीमा रहेका समुदायको अधिकार संरक्षण, वातावरण संरक्षण र समान अवसर सुनिश्चित गर्न पहल गरिरहेका छन् । सामाजिक न्याय दिवसले सबै नागरिकलाई न्याय, समानता र मर्यादित जीवन सुनिश्चित गर्न सामूहिक प्रतिबद्धता जनाउन प्रेरित गरेको छ ।
