युरोपेली फुटबल महासंघ (युइएफए) ले फिफा अध्यक्ष जियानी इन्फान्टिनोप्रति असन्तुष्टि कायमै रहेको जनाउँदै आवश्यक सुधार नभएसम्म फिफाका प्रतियोगिता बहिष्कार गर्ने चेतावनी यथावत् रहेको जनाएको छ ।
इंग्ल्यान्डको फुटबल संघ (एफए)ले इन्फान्टिनोको नेतृत्वप्रतिको समर्थन फिर्ता लिएपछि युइएफएको धारणा थप कडा बनेको हो । एफएले इन्फान्टिनोको नेतृत्वमा विश्वास घटेको भन्दै उनको पुनःनिर्वाचनलाई समर्थन नगर्ने निर्णय गरेको जनाएको छ ।
विवादको मुख्य कारण फिफाले विश्वकपको व्यावसायिक संरचनामा निजी लगानी भित्र्याउने प्रस्ताव अघि सारेको थियो । यो प्रस्तावको युइएफएलगायत विभिन्न राष्ट्रिय फुटबल संघहरूले तीव्र विरोध गरेका थिए । व्यापक आलोचनापछि फिफाले प्रस्ताव फिर्ता लिँदै इन्फान्टिनोले माफीसमेत मागेका छन् ।
यद्यपि, युइएफएले प्रस्ताव फिर्ता लिनु र माफी माग्नु मात्र पर्याप्त नभएको स्पष्ट पारेको छ । भविष्यमा यस्ता निर्णय दोहोरिन नदिने प्रतिबद्धता र फिफाको नेतृत्वप्रति विश्वास पुनःस्थापित नभएसम्म बहिष्कारको चेतावनी हट्ने अवस्था नरहेको महासंघको भनाइ छ । यस विवादले विश्व फुटबल प्रशासनमा नयाँ तनाव सिर्जना गरेको छ ।
विवाद समाधान हुन नसके आगामी फिफा प्रतियोगितामा केही युरोपेली देशहरूको सहभागितामाथि समेत प्रश्न उठ्न सक्ने अन्तर्राष्ट्रिय सञ्चारमाध्यमहरूले जनाएका छन् ।
