थाइल्यान्डमा एक किशोरले अन्धाधुन्ध गोली चलाउँदा कम्तीमा ७ जनाको ज्यान गएको छ । राजधानी बैंकको बाहिरी क्षेत्रमा रहेको आफ्नो घरमा हजुरबुबा र हजुरआमाको हत्या गरेपछि नोन्थाबुरी प्रान्तको देब्सिरिन विद्यालयमा पुगेर ५ जना शिक्षकको हत्या गरेका समाचार संस्था रोयटर्सले जनाएको छ ।
गोली चलाउने आरोपी १४ वर्षीय विद्यार्थी पनि मृत भेटिएका खबरमा उल्लेख छ । यस्तै घटनामा १५ जना घाइते भएका छन् । प्रहरीका अनुसार गोली चलाउन प्रयोग भएको ९ एमएमको पेस्तोल किशोरका हजुरबुबाको थियो । उनका हजुरबुबा शिक्षक रहेका प्रहरीले जनाएको छ । प्रहरीका अनुसार उनले कम्तीमा २६ राउन्ड गोली चलाएका थिए र उनीसँग थप ३४ राउन्ड गोली फेला परेको थियो ।
यो घटनापछि थाइल्यान्डको विपक्षी पिपुल्स पार्टीका नेता नत्थाफोङ रुएङपान्यावुतले देशको बन्दुक नियन्त्रणसम्बन्धी कानून पुनरवलोकन गर्न सरकारसँग माग गर्नुभएको छ । थाइल्यान्डमा यस क्षेत्रमा बन्दुकको स्वामित्वको उच्चतम दर रहेको छ । यहाँ झन्डै १ करोड बन्दुकहरू प्रचलनमा रहेको अनुमान छ ।
देब्सिरिन विद्यालय थाइल्यान्डका विभिन्न ठाउँमा शाखा रहेको र देशको प्रतिष्ठित शैक्षिक संस्था हो । यसअघि सन् २०२२ मा बन्दुक र चक्कु लिएर देशको उत्तरमा रहेको नर्सरीमा प्रवेश गरेका एक जना पूर्वप्रहरी अधिकारीले २४ जना बालबालिका र १२ जना वयस्कको हत्या गरेका थिए । यो घटना थाइल्यान्डको सबैभन्दा घातक नरसंहारमध्ये एक थियो ।
