नोबेल शान्ति पुरस्कार विजेता नर्गेस मोहम्मदीको स्वास्थ्यलाई लिएर चिन्ता बढीरहेका बेला इरानले पूर्व जानकारी नदिई उहाँलाई उत्तरी भागको एक जेलमा स्थानान्तरण गरेको छ । दुई दशकभन्दा लामो समयदेखि महिला अधिकार र इरानी नागरिकको स्वतन्त्रताको अभियानको नेतृत्वका लागि सन् २०२३ मा उहाँलाई नोबेल शान्ति पुरस्कारबाट सम्मानित गरिएको थियो ।
५३ वर्षीया मोहम्मदीलाई गएको डिसेम्बर १२ मा पूर्वी शहर मशहादमा एक अन्त्येष्टि समारोहमा इस्लामिक धार्मिक नेतृत्वविरूद्ध बोलेको आरोपमा पक्राउ गरिएको थियो । उहाँले इरानमा हालै भएको सरकारविरोधी आन्दोलनका लागि नागरिकलाई उक्साएको आरोप पनि लगाइएको छ ।
यसै महिनाको शुरुमा उहाँले भोक हडताल गर्नुभएको थियो । अन्तर्राष्ट्रिय समाचार संस्था एएफपीका अनुसार उहाँलाई जेलमा लैजानुपूर्व अस्पताल भर्ना गरिएको थियो ।
पक्राउ परेपछि मोहम्मदीलाई मशादमा गुप्तचर मन्त्रालयको हिरासतमा राखिएको थियो र उहाँलाई इरानभित्र रहेका भाइ र उहाँका इरानी वकिलसँग फोन गर्न अनुमति दिइएको थियो । तर उहाँलाई अहिले देशको उत्तरी भागमा रहेको जन्जान शहरको जेलमा सारिएको आफन्तले बताएका छन् ।
