काठमाण्डौ । चालू आर्थिक वर्षको अन्त्यसम्ममा देशको सार्वजनिक ऋण साढे २९ खर्ब नजिक पुग्ने भएको छ । सार्वजनकि ऋण व्यवस्थापन कार्यालयकाअनुसार २०८३ सालको असार मसान्तसम्ममा कुल सार्वजनिक ऋण २९ खर्ब ४२ अर्ब पुग्ने अनुमान छ । जसमा ४६ दशमलव ८५ प्रतिशत आन्तरिक र ५३ दशमलव १५ प्रतिशत बाह्रय ऋण हुनेछ ।
गएको आर्थिक वर्ष २०८१/८२ मा दुई खर्ब ३१ अर्ब आठ करोड रुपैयाँ थपिएसँगै सार्वजनिक ऋण २६ खर्ब ६० अर्ब रुपैयाँ पुगेको थियो । सार्वजनिक ऋण व्यवस्थापन कार्यालयका अनुसार कुल गार्हस्थ्य उत्पादन (जीडीपी) मा ऋणको अनुपात चालू आर्थिक वर्ष २०८२/८३ को अन्त्यसम्ममा ४३ दशमलव ०८ प्रतिशत हाराहारीमा रहने अनुमान छ ।
जीडीपीको तुलनामा ४५ प्रतिशतसम्मको ऋणको हिस्सालाई अर्थशास्त्रीहरुले जोखिम रहित मान्दै आएका छन् । तर सरकारले तलब भत्तादेखि राजनीतिक स्वार्थ पूर्तिका लागि प्रतिफल नदिने खालका कार्यक्रमहरुमा ऋण लिने प्रवृत्ति बढ्दा ऋणको पासोमा देश फस्ने त होइन भन्ने विज्ञहरुले चिन्ता व्यक्त गर्दै आएका छन् ।
